مرحبا بك

21-02-2009

تحية طيبه ..

إهداء لمن غاب وعاد لنا ! ! !

مرحبا باللي رجع لي عقب ماطول بعاده ،،
مرحبا بك عـد ماقلبي نبض لك "مرحبا بك"

السهر والليل ونجومه ودمعي والوساده ،،
والمشاعر والقصايد .. كلها قالت هـلا بك

غبت عني والسعد ولى مع أيام السعاده ،،
وقفت أحـلام حبي وإنتهت عند بابك

ويش أقول وكيف أعبر لك .. عن أيام النكاده ؟؟
في غيابك .. كانت أيامي كئيبه في غيابك

في غيابك صرت مثل اللي تغرب في بلاده ،،
عايش بالجسم وإلا الروح تمشي في ركابك

مانسيت ولا نسيت الحب ياصافي وداده ،،
كيف ننسى الود والخافق ينزف من صوابك ؟؟

ياشعرة الجوف حبك مايبي مني شهاده ،،
شوف وأحكم كيف أحبك واتلذذ في عذابك

عالي قدرك وغالي .. والوفا يازين زاده ،،
والوفا يالأجوديه طبع في حضرة جنابك

وارثه طيب الجدود وشيمه وأصل وعباده ،،
عزوة أخوان كرام .. لأجلهم يحسب حسابك

بنت عــز ومهرةً في شموخها والزين غـاده ،،
حسنها لخبط نظام القلب .. وأسلاكه تشابك

وأحمد الله يوم جاني بعدما طول بعاده ،،
وما أقـول إلا هـلا بك يابعـد عمري هـلا بك

أجبرتني كلماتها على أستضافتها هنا ..