نجمتنا لهذا الأسبوع ( هالةم ) على كرسي الإعتراف ..‘

22-12-2006

اول شي بحب اتشكرك يا بو ماجد على كلامك الرقيق وعلى الاستضافة والله يسترني من اسئلتكم وانشالله اقدر اجاوب عليها كلها وتحياتي للجميع

22-12-2006

سلام للاخ العزيز فتى اشتقنالك بالنسبة لاسئلتك :

1- اجمل حكمة هي ان انت اكرمت الكريم ملكته وان اكرمت اللئيم تمرد . حصلت معي كتير مواقف من هالنوع.

2- وصلت للمنتدى عبر زميلي بالشغل كنا عم نتناقش بموضوع وكتبلي اسم الموقع ونصحني ادخل وقلي رح تلاقي هاد الموضوع مع معلومات وصور، دخلت المنتدى وعجبني سجلت وصرت عضو دائم تقريبا.

3- احساس كتير حلو التواصل ما بين الناس خصوصا لما يكون في بينهم مسافات واختلاف مهم ومفيد ، استفدت من المنتدى طبعا تعلمت اكتب بالعربي ما كنت متعودة ولغتي عم تتحسن واستفدت كتير معلومات بكل المجالات .

اما الفائدة الاهم هي المحبة اللي بتجمعنا كلنا هاي بحد ذاتها اعظم استفادة انو يكون الك اخوة من كل الجنسيات والالوان والمذاهب اخوة في الله ومحبة صادقة بدون اي غاية او مصالح شخصية.

شكرا الك اخي الفتى وانشالله كون اجبت عن كل اسئلتك

22-12-2006

عزيزي بو ماجد رح حاول جاوب على اكبر قدر ممكن من الاسئلة

1- بالنسبة العولمة وللحب عبر الانترنت يمكن حكينا مرة بهالموضوع بشكل مختصر وبتذكر كان رايي انو مهما تطورت الشاشة تبقى آلة بدون روح واحساس يعني ممكن يصير اعجاب، وتوارد خواطر، وتقارب افكار بين شخصين بس لا يكتمل الحب الا من خلال اللقاء المباشر يعني صوت وصورة لانه اصدق واقرب للواقع لانه ممكن نرسم صورة معينة للشخص مغايرة للطبيعة ومضخمة وننصدم بالواقع الفعلي ، ما بعرف مدى نجاحها ومدى فشلها بس بالنسبة الي انا مح الحب التقليدي جدا.

2- حال الامة العربية والاسلامية مذري للغاية اسوأ من هيك ما فيه والله ينجينا من الاعظم اللي عم نشوفوا بالعراق وبفلسطين وبلبنان ما بيدعي للتفاؤل ابدا ، ما بعرف نحنا العرب يمكن لازملنا تسونامي تغير جغرافيتنا وتمحي التعصب والجهل المعشش فينا ، حتى نفوق لانفسنا ونحس بالخطر اللي ناطرنا .

3- اقرب مكان الى قلبي هو مكان في جنوب لبنان ما بنتمي الو بس بحبو كتير اسمو " طريق الكفور" طبيعة المنطقة خلابة والي فيها ذكريات حلوة وكل ما صحتلي الفرصة بحب زور هالمنطقة وامشي فيها لوحدي .

4- انا ما بحب الاسماء المستعارة ولا الالقاب " هالة " هو اسمي الحقيقي بستخدموا بكل المجالات والمنتديات لاني لما بسجل بمنتدى بسجل بكامل ارادتي وبكون مقتنعة باللي عم بعملوا وما عندي شي اخجل منو وما بتخبى ورا اصبعي ، (مع احترامي للاشخاص اللي بسجلوا بغير اسماء فلكل واحد وجهة نظر وطريقة تفكير مختلفة) اما حكاية الميم فسببها اني كنت ادخل الخليفي سابقا وانقطعت فترة ولما رجعت لقيتو تغير يعني صار في تحديث وانا نسيت كلمة السر وما قدرت ادخل باسم هالة القديم اللي كنت مسجلة فيه ففضلت سجل من جديد بنفس الاسم طبعا لاني بحب اسمي كتير وبحب يتعرف عليي الناس بنفس الاسم فاضطريت حط اول حرف من اسم عائلتي حتى ما يصير مشكلة بالتسجيل .

5- من خلال ابحاري بالشبكة العنكبوتية استفدت الكثير بكل المجالات السياسة والثقافية والدينية ومعلومات عامة كتير واستفدت كمان بشبكة علاقات ومعارف من مختلف الدول العربية تعرفت بلهجات وعادات وتقاليد مختلفة .

6- اشعر بالسعادة لما بكون من حولي سعيد زوجي اولادي اخواتي يعني كل اللي بحبهم، وبكون سعيدة اكتر لما بقدر قدملهم شي يسعدهم مهما كان بسيط . اما الحزن فاكيد لما بخسر شخص عزيز الموت والفراق هو اكتر الاشياء المحزنة بالدنيا وكل شي من بعدها بهون ، بحزن لما بشوف شخص مريض او كئيب او عندو مصيبة وما بقدر قدملوا المساعدة لانه مصيبتو بتكون اكبر من انو لاقي الحل عندي ، بيحزني الظلم كتير كتير .

7- احب الاقسام الى قلبي الراي والراي الاخر ، من خلاله صار كتير تواصل بين الاعضاء ومشاركة افكارهم بس طبعا الاختلاف بالراي لا يفسد للود قضية خصوصا لما بصير الحوار بطريقة راقية وحضارية ومحترمة.

8- بحترم الرجل لما يكون رجل بكل معنى الكلمة يحافظ على كل مبادئه ( الشهامة - الكرم - الاخلاق ) وعزة نفسه وقوة شخصيته ويعرف متى يكون لين ومتى يكون صلب ، بحتقر الرجل لما بيتحول لانثى ويفقد سمات الرجولة لما يصيبو الغرور اللي بغير مكانو ولما يكون ثرثار ، وعندما يصير خاتم بيد الانثى منفذ لكل طلباتها دون وعي و تفكير .

9- اجمل شيئ في الحياة الحب بكل معنايه حب العبد لربه ، حب المراة للرجل والعكس، حب الام لابنائها ، حب الابناء لاهلهم ، الحب في الله اللي بيجمع الاصدقاء واللي جامعنا كاعضاء ما في اجمل من الحب باختلاف الوانه واشكاله لما يكون صادق وحقيقي وبدون غايات ، الدنيا بدون حب بتصير غابة وحوش طبعا .

10- برايي العضو يجب ان يهتم بنوعية المواضيع وقيمتها مش بالكمية انا عن نفسي ما عندي مواضيع يمكن موضوع واحد لانه بحب لما نزل موضوع يكون الي بصمتي الخاصة وما يكون منقول مع انو طبعا مش غلط وهاي حال كل المنتديات بس لكل واحد طريقة تفكير معينة ، وبفضل نزل شي خاص فيني بس بشارك بكل المواضيع اللي بتلفتني وبعطي رايي وبستفيد من آراء غيري ومن اختلاف وجهات النظر.

11- في كتير حكم الواحد بتعنيلو بس رح اختار وحدة ثانية غير اللي حكيت عنها للاخ فتى وبحبها كتير وهي
" ليس كل ما يلمع ذهبا " عشان الواحد ما ينغش كتير بالمظاهر الخداعة ويكون واقعي بحياته وخيارته

12- دع عنك لومي فإن اللوم إغـراء *** وداوني بالتي كانت هي الــداء
صفراء لا تنزل الأحزان ساحتها *** لو مسها حجر مسته ســـراء
بعتقد لابو نواس بحب هالقصيدة كتير وبتذكرها من ايام المدرسة .

13- بحب قراءة الكتب السياسية والروايات آخر كتاب قراته كان حال العرب لادوار سعيد وكان حلو كتير
وبحب رواية فوضى الحواس لاحلام مستغانمي رغم الجدل اللي صار حولها.

14- مطربتي المفضة فيروز، ومن الجيل الجديد بحب اسمع اليسا بحب ستايل الاغاني الرومنسية عموما الهادية
اما اجمل اغنية عندي فهي لون عيونك غرامي .

15- لو رجع الزمن فيني للوراء بختار 65 بالمية من حياتي وبلغي الباقي .

16 - اكيد في قرار ندمت عليه كتير كتير بحياتي والمشكلة انو القرارات الخاطئة بيترتب عليها شغلات كتير
بالمستقبل وممكن تلازمنا كل حياتنا او على الاقل لفترة من الزمن لانه الماضي هو امتداد للحاضر والمستقبل
اما شو هو القرار فطبعا سرررررررر وما بقدر احكيه.

هلكتني يا بو ماجد وانا حكيت كتير كتير بس انشالله يكون كلامي خفيف على قلوبكم وما تكونوا مليتوا وشكرا الك على هالكرسي بس لا بقى تعيدها ( هههههههههههههه)

22-12-2006

اخي العزيز VICIOUS
سر الميم انا ذكرتوا لابو ماجد في ردي عليه بس رح ارجع اكرروا هو اول حرف من اسم عائلتي وحتى ما يصير تكرار للاسماء يعني تمييز عن هالات غيري مش اكتر وازا حبيتو تنادوني هالة بدون ميم بكون افضل

22-12-2006

أعجز عَن التعبير عَن مدى سعادتي بتواصلكِ الجميل وردودكِ الشيّقة جداً ..

وتوقفت قليلاً حينما وصلت إلى الجملة التالية :

اقتباس


	بحزن لما بشوف شخص مريض او كئيب او عندو مصيبة وما بقدر قدملوا المساعدة لانه مصيبتو بتكون اكبر من انو لاقي الحل عندي ، بيحزني الظلم كتير كتير .

شعرت بأحاسيس تتدفق مِن بين السطور يا أختي الفاضلة ..

الله يسعدك ولاتشوفين شر أو مكروه "يا رَب"

وطولي بالك علينا يالغالية .. ^_^

اقتباس


	ما في اجمل من الحب باختلاف الوانه واشكاله لما يكون صادق وحقيقي وبدون غايات ، الدنيا بدون حب بتصير غابة وحوش

100% كلامك صحيح وأكثر مِن رائع ..‘

نجمتنا لهذا الأسبوع ( هالةم ) على كرسي الإعتراف ..‘

قسم كرسي الإعتراف