نجمتنا لهذا الأسبوع ( هالةم ) على كرسي الإعتراف ..‘

22-12-2006

اخوي وصديقي العزيز ابو عمر انا ما نسيت اسئلتك ووعدتك جاوب عليها على كرسي الاعتراف وهي كالتالي:

1 ارتباطك بالوطن الام والوالدة والاهل

ارتباطي بوطن الام اكيد وثيق جدا بحب بلدي لبنان كتير رغم كل الظروف والحروب اللي مرت عليه ورغم احساسي احيانا بالظلم وانو ما عشنا كبقية الشعوب وما اخدنا حقوقنا كمواطنين متل غيرنا بس بتبقى مسالة الانتماء موجودة بقوة وكل واحد بلدو غالية عليه بكل سلبياتها وايجابياتها وانا متل السمك بالمي ازا شلتو عنو بموت ما بقدرعيش برات بلدي ابدا .

اما ارتباطي بامي والاهل فانت امسكتني من الايد اللي بتوجعني علاقتي بعائلتي كانت رائعة كنا عيلة متماسكة فيها كتير حنان وعاطفة كبيرة ومحبة بس انا للاسف خسرت اهلي ( امي وابوي وبنت اختي ) من 8 سنوات وما بحب احكي بالتفاصيل لانه الموضوع بيالمني كتير ويبفتحلي جروحات عانيت منها كتير ومش بسهولة قدرت اتخطاها.
بس الحمدلله على كل شي عندي الان زوجي واولادي واخواتي واصدقائي ملوا علي حياتي، بس اكيد في بقلبي حسرة كبيرة لانه ما كان لي عرس وفرح وزفة متل اي بنت اهلي ما شافوني عروس متل ما كانوا بيحلموا وما تعرفوا على زوجي وما فرحوا باولادي رح تبقى غصة بقلبي ما بيمحيها الزمن ، ومكانهم ما بيقدر يعبيها اي انسان بهالدنيا حنان الام وعاطفة وحماية الاب ما في زيهم بالعالم ابداااا خسارتي الهم كبيرة واشتياقي الهم اكبر. جربت اتهرب من سؤالك عن الاهل اكتر من مرة بس بعدين فكرت انو ازا حكى الواحد عن الشي اللي مضايقوا يمكن يخفف عنوا ويرتاح اكتر .

2- كيف تتقبلين الهزيمة وان لم يكن لك يد فيها

بتقبل الهزيمة بروح رياضية عالية ازا كانت شخصية عندي قناعة انو ما في شي ثابت بهالحياة يعني مقابل كل طلعة في نزلة ومع كل غروب في اشراقة فجر جديد ، فالحياة زي كفة الميزان متأرجحة دائما مرة معك ومرة عليك اليوم هزيمة وبكرا نصر واليوم حزن بكرا فرج ، بطبعي ببسط الامور وبتفائل دايما وبعتبر اخدت نصيبي من الحزن وازا كان الاسى والهزيمة ضريبة على كل واحد فانا دفعت الضريبة المتوجبة عليي وبعتبر الايام القادمة لازم تكون افضل واحسن باذن الله ، بس اللي ما بتقبلوا الهزيمة والنكسات العربية اللي ما الها مثيل والتخاذل العربي ( الرسمي وليش الشعبي) خصوصا اللي شفناه بالحرب الاخيرة على لبنان كان عندي احساس بالمرارة الشديدة .

3- الرياضة فى حياتك :

الرياضة جزء مهم من حياتي بحب المشي و بزور نادي رياضي مرتين في الاسبوع حسب ظروف شغلي وبيتي وبمارس السباحة باستمرار وبعتبرها من افضل واهم انواع الرياضة وبتريحني نفسيا كتير خصوصا لما بكون زعلانة ومعصبة .

4- المعاملة فى المنزل هل هناك تفرقة بين البنت والولد عندكم كعائلة :

ولدت يا عزيزي في بيت ديمقراطي جدا ما في تفرقة بين الولد والبنت بل بالعكس يمكن البنت كانت تاخد حقها اكتر كان في مساحة حرية كبيرة واحترام لاراء الاخرين ، تربيت على مبادى احترام الاخر كما هو باختلافه وسلبياته واتعامل معو كما هو مش كما بتمنى انو يكون .
كان في موضوعين اهلي كانوا يتعاملوا معنا انا واخواتي فيهم بمنتهى الرقي والحضارة اختيار الدراسة الجامعية التخصص يعني واختيار الشريك ( بموضوع الزواج ) طبعا في نصايح وارشادات بحسب خبرتهم الانضج بس الخيار الاخير بيرجع النا نحنا وبس .

- احلامك ماذا حققت منها ورضاك

احلامي حققت جزء كبير منها بس طبعا مش كلها ليس كل ما يتمنى المرء يدركه ، تجري الرياح بما لا تشتهي السفن عندي اشياء ما قدرت اعملها وكنت بتمنى لو صحتلي الظروف بس عموما انا راضية عن حياتي وعن اللي وصلتلوا والقناعة كنز لا يفنى
الله اخد مني اشياء عزيزة كتير عليي زي اهلي مثلا بس بالمقابل اعطاني كتير نعم ومميزات وظروف حياة افضل من غيري بكتير ولازم دايما اتذكر نعمو واتشكروا عليها وشوف النصف المليان من الكوب مش الفارغ زي ما بقولوا.

آخ وجعتلك قلبك يا بو عمر بكلامي واحزاني ( انت اللي جبتوا لنفسك انت اللي حطيتني على هالكرسي انا ما دخلني ) بريئة يا بييييييييه

تحياتي الك وانشالله ما كون طولت عليك

22-12-2006

السلام عليكم ورحمة الله وبركاته
شكرا أخت "هالة" على الأجوبة الكافية والوافية
وهذا كان منتظرا منك أيتها الأخت الفاضلة
تقبلي تحياتي وامتناني ودمتي بخير..

22-12-2006

مرحبا اختي العزيزة هالةم
عضو جديد يطلب منك التكرم والرد على اسئلتة التالية :

1-ما الفقر بنظرك؟.
2-ما الشئ الذي تشبهينه بالألماس في حياتك؟
3-ماذا يعني لكِ (الألم)..
4 ـ دائما مايقال الوصول الى القمه صعب ولكن الاصعب هو المحافظه عليه ماذا برايك ؟؟
5 ـ هل تقسو هالةم على نفسها ؟ ومتى ؟؟
6- هل ينشغل تفكير هالةم فيما ستقدمه من جديد للمنتدى؟؟
7ـ للأدب أشكال مختلفه ومتوعه . فما الأشكال الأدبية التي تتقنها هالةم ؟
8ـ ما طموحك الأدبي في المستقبل ؟

23-12-2006

أختي الفاضلة "هــالـــــــــة" ... حفظها الله

- - - - - - - - - - - - - - - - - - - - - - - - - - - - -

1) ما هُوَ شعوركِ حينما تم ترشيحكِ لكرسي الإعتراف ؟؟

2) ما هُوَ مؤهلك الدراسي ؟؟ وما هِيَ الشهادة التي تمنيتي أن تحصلي عليها ؟؟

3) هل أنتي موظفة ؟ وما هِيَ "طبيعة عملكِ" ؟ وما هِيَ هواياتكِ المفضلة ؟؟

4) هل تجيدين الطبخ ؟ وهل تهتمين بموضوع السُعرات الحرارية ؟؟

5) هل تشعرين بأنكِ توفقين بين مسؤولياتكِ مَعَ الأهل والعمل والنت والأصدقاء ؟؟

6) ما هِيَ أكلتكِ المُفضلة ؟ وما هِيَ شجرتكِ المُفضلة ؟ وماهِيَ وردَتكِ المُفضلة ؟
وما هِيَ فاكهتكِ المُفضلة ؟ وما هُوَ لونكِ المُفضل ؟ وما هُوَ شرابكِ المُفضل ؟

7) ماذا تفعلين حينما تشعرين بأنكِ في قمة "السعادة" أو "الحُزن" لا سَمَحَ الله ؟؟

8) ما هِيَ المعايير الرئيسية التي تقومين مِن خلالها بإختيار الأصدقاء مِن حولكِ ؟؟

23-12-2006

عزيزي تاج العين

:

1 - قاتل الله الفقر وسيدنا علي بقول "لو كان الفقر رجل لقتلته" و" الفقر في الوطن غربة " ، اصعب شي بالدنيا الحاجة والفقر بذل صاحبه الله يبعدو عنا جميعا" .

2- الالماس اغلى واجمل المعادن وبريق الالماس لا مثيل له ابدا" فانا اشبه الالماس للصديق الوفي والمخلص لانه الاخلاص اصبح عملة نادرة جدا .

3- الألم فظيع وكل ما كان الدوز الجرعة زايدة كل ما زادت فظاعته سواء كان جسدي او نفسي . اخدت نصيبي من الألم زي كل البشر بس الحمدلله بقوة الايمان والصبر منقدر نتغلب عليه ، وعندي قناعة دائمة ان الدمعة هي السبيل للابتسامة ومع كل غروب اشراقة فجر جديد .

4- عزيزي الوصول الى القمة صعب طبعا بكل المجالات السياسية والفنية والاجتماعية ولما يقال المحافظة على القمة اصعب ، فبالتكيد المقصود انك تقدر تحافظ على هذا البريق لانه الغرور لما يصيب الانسان وهو في القمة ويعتبر نفسه صار عالم بكل شي يعني نهايته الحتمية لانه مها علا شانك فانت تبقى بحاجة للمعرفة وبحاجة للاخرين .

5- اقسو على نفسي (ما بعرف) ممكن بفترة من الفترات مريت بظروف نفسية صعبة جدا نتيجة فقدان اشخاص عزيزين على قلبي وكان ردات فعلي عنيفة وهملت نفسي جدا خصوصا صحيا قطعت الاكل وخسرت وزن فظيع
بس الحمدلله تخطيت هالمرحلة ، بس عموما ما بقسى على نفسي ابدا بالعكس بدلع حالي كتير ....

6- انا ما بعتبر اني قدمت شي للمنتدى عموما ، فالمنتدى موجود ونشيط بجهود باقي الاعضاء والمشرفين ، اما انو تفكيري مشغول باي جديد المنتدى لا مع اني بتمنى طبعا اني اقدر ضيف اي جديد بس وقتي وظروفي العائلية لا تسمح وانشالله بالمرحلة القادمة اقدر قدم شي جديد لتفعيل المنتدى ويكون الي بصمتي الخاصة .

7- انا لا اتقن اي شكل من اشكال الادب

بحب الادبيات كتير وبحب الشعر ومكتبتي مليئة بكل الدواوين اللي ممكن تخطر ببالك ، بس انا لغتي العربية الفصحى مش قوية كتير بس الشي اللي كنت اسمعوا من زملائي وخصوصا ايام الجامعة اني عندي طلاقة بالكلام وسلاسة بالتعبير وبقدر اوصل الفكرة بشكل جيد ( ما بعرف مدى صدقية هالكلام) بترك التعليق لغيري .

8- اما طموحاتي فهي عديدة ولكنها ليس ادبية طموحات مهنية وعائلية وشخصية بتمنى انو الله سبحانه وتعالى يوفقني على تحقيق جزء كبير منها.

وشكرا الك على الاسئلة وانشالله كون قدرت جاوب على كل استفساراتك بشكل مقبول ومرضي

نجمتنا لهذا الأسبوع ( هالةم ) على كرسي الإعتراف ..‘

قسم كرسي الإعتراف